Salah lihat

"Dun, abang mo tanya sama lu nih," kata Jaka pada Adiknya yang lagi ngisi TTS.
"Tanye ape bang? Matematika, Saint, ape Bahase Inggris, " kata Adun sok pinter.
"Bukan... Bukan ntu, abang bukan mo nanya pelajaran," kata Jaka.
"Emang mo nanya apaan bang? Kalo nanya jalan mah Adun kaga tau," kata Adun, sambil memijit keningnya sok mikir.
"Eh bukan itu juga, abang juga tau lu kaga tau jalan.. lah pulang sekolah aje nyasar mulu." kata Jaka ngeledek adiknya.
"Emang abang mo nanya apaan sih?" kata Adun sambil nyengir.
"Itu... Kemaren, waktu nganterin lu sekolah... Abang liat cewek cantik nganterin Mimin temenlu." kata Jaka, "Itu siapenye Mimin?" tanya Jaka lagi.
"Yang pake baju merah bang?" tanya Adun.
"Iye," jawab Jaka.
"Yang pake celana jin?" tanya Adun lagi.
"Iye," jawab Jaka lagi rada kesel.
"Naah yee.. Ketauan nih... Abang naksir yee?" goda Adun.
"Ah elu Dun, ngeledek abang aje.." kata Jaka keki "cepetan dong kasi tau... Itu siapenye Mimin? Tantenye ye?" tanya Jaka lagi, penasaran.
"Hehehe emang yakin abang naksir ame die?" kata Adun cengengesan.
"Yaa... gitu deh. Emang abang ga boleh naksir cewek?" kata Jaka rada malu.
"Bolehlah bang, cuman.. hehehe... ape abang kaga salah liat?" kata Adun ngeledekin abangnye.
"Kaga dah... Abang kaga salah liat. Itu cewek cakep banget.," kata Jaka semangat.
"Bener nih, abang naksir sodarenye Mimin?" tanya Adun tetep sambil nyengir.
"Iye bener... kenalin abang ye," kata Jaka.
"Abang kaga nyesel ntar?" tanya Adun rada heran.
"Kaga..! Emangnye kenape musti nyesel.?" ujar Jaka balik nanya.
"Kaga kenape-nape bang. Masalahnya die emang sodarenye Mimin, tapi bukan tantenye," kata Adun.
"Emang kenape kalo bukan tantenye. Sodare sepupunye juga kaga ape kan?" kata Jaka.
"hehehe... abang nih... Die emang bukan tantenye Mimin, bukan pula sepupunye Mimin." kata Adun tambah cengengesan.
"Emaknye Mimin?" tanya Jaka.
"bukan juga," kata Adun lagi.
"Tantenye bukan... Sepupunye bukan... Emaknye abang kenal... Trus siapenye Mimin dong?" tanya Jaka bingung.
"Hehehe... Die itu Omnye Mimin bang," kata Adun.
"Haa.. !!??" Jaka melongo.

By: azhasim
As posted on www.MobineSSia.com